Tensionet brenda Radio Televizionit Shqiptar vijojnë të dalin në dritë, teksa pas denoncimit publik të Kozeta Kurtit për pagesat e prapambetura, sot ka reaguar edhe Florian Agalliu, drejtuesi i Emisionit të Mëngjesit në RTSH.
Në një letër të hapur drejtuar drejtoreshës së RTSH-së, znj. Eni Vasili, Agalliu ka shprehur zhgënjimin dhe indinjatën e tij për vonesat e pagesave ndaj stafit të emisionit që ai drejton. Sipas tij, ekipi ka punuar në kushte të vështira, me përkushtim të lartë, ndërkohë që shpërblimi për punën e tyre ka mbetur pezull për muaj me radhë.
“Kemi sakrifikuar mëngjeset tona (4:30 është një orë që edhe zogjtë e shohin me frikë), kemi sjellë profesionalizëm dhe përkushtim, por pagesat duket se janë harruar në ndonjë sirtar,” – shkruan ai në letrën e publikuar sot.
Agalliu ngriti gjithashtu pyetje konkrete dhe të drejtpërdrejta për drejtuesen e RTSH-së:
Pse është mbyllur edhe dera e protokollit për komunikim me punonjësit?
Ai ironizoi edhe faktin që zyra e protokollit është “spostuar në paradhomë”, për të shmangur kontaktin me stafin, ndërsa letra e tij e parë kishte mbërritur “si dikur dashnorët, nëpërmjet Postës Shqiptare”.
Letra e hapur e Agalliut është reagimi më i fundit ndaj krizës së brendshme financiare dhe menaxheriale që duket se po trondit transmetuesin publik, i cili prej disa muajsh ndodhet nën drejtimin e Eni Vasilit, emëruar në këtë post në prill 2025.
Postimi i plote:
E nderuara Drejtoreshë e RTSH zj.Eni Vasili ,
Shpresoj që kjo letër t’ju gjejë në gjendje të mirë dhe të qetë – atë qetësi që duhet të ketë kushdo që mban mbi supe emrin e RTSH-së, një institucion që meriton më shumë dinjitet sesa heshtje.
Duke iu drejtuar me respektin e duhur , atë që ju dhe ata që sollët nga pas nuk e treguat kurrë ndaj nesh, dua t’ju rikujtoj një “detaj” të vogël por shumë të rëndësishëm: ekipi i Emisionit të mëngjesit– një program i miratuar dhe i strukturuar nga vetë RTSH – ende pret pagesat e prapambetura. Po, ato pagesa që duket sikur kanë humbur rrugën dhe kanë mbetur diku mes zyrave tuaja.
Ne kemi sakrifikuar mëngjeset tona (4:30 është një orë që edhe zogjtë e shohin me frikë), kemi sjellë në ekran profesionalizëm, energji dhe përkushtim. Por, ndryshe nga entuziazmi ynë, shpërblimi ka mbetur pezull – ndoshta harruar në ndonjë sirtar të mbyllur me dryn , ndoshta i bllokuar në ndonjë proces burokratik që ka marrë pushime më të gjata se vetë stafi juaj.
Kështu që, meqë transparenca nuk është luks por detyrim, ju lutemi të na informoni qartë:
•Kur do të kryhen pagesat e prapambetura?
•A ka një afat zyrtar që ne mund t’i referohemi , apo duhet të vazhdojmë të hamendësojmë si fallxhorë?
•Dhe si ndodh që edhe dera e protokollit – e vetmja shpresë për komunikim – u mbyll si të ishte një sekret shtetëror?
Por falë Postës Shqiptare unë mbërrita në dorën tuaj me letrën që ju kam nisur muaj më parë , si dashnorët dikur sepse ju nuk keni më një zyrë protokolli , atë e keni spostuar ne paradhomën tuaj që të siguroheni mirë që askush që nuk doni ju, mos t’ju gjejë kollaj. Meqë nuk u munduat të merreni me ne “mengjezarakët”, ne “3orshat” e transmetimeve live , pa dhënë asnjë përgjigje , vendosa t’ju shkruaj publikisht. Kjo heshtje nuk është vetëm e pafalshme, është fyerje për njerëzit që punuan dhe punojnë për këtë institucion.
Dhe , nëse më lejoni një shaka të vogël: PO PREZANTUESIT E RINJ SI DO T’I PAGUANI KUR NUK KENI LIKUJDUAR AKOMA TË VJETRIT APO EDHE ATA DO TË USHQEHEN ME PREMTIME? Në pritje për një përgjigje të qartë dhe zyrtare , duke uruar që të jetë më shumë sesa një forme e re heshtjeje. Me respekt, FLORIAN AGALLIU
