Reshjet e shiut kanë vazhduar gjatë natës në të gjithë territorin e vendit, duke sjellë rënie gurësh, inertesh dhe prezencë uji në trup të rrugës. Autoriteti Rrugor Shqiptar bën një bilanc të situatës dhe thotë se të gjitha ekipet janë në terren.
Kurse në zonën veriore, në lartësi mbi 1100 m, ka pasur reshje dëbore konkretisht në akset: Bogë-Theth, Hani i Hotit-Vermosh, Surel-Qafë Priskë-Qafë Mollë, Elbasan-Gjinar, Ibë-Krrabë-Elbasan, Qafë Mali-Fierzë.
Akset që kanë pasur probleme:
– Qafë Dushk-Sevaster (km 10-11): qarkullimi me një korsi për shkak të ngushtimit të rrugës.
– Valare-Erind-Çajup (km 7+600): rrëshqitje aktive, aksi i bllokuar në këtë vend po punohet për hapjen.
– Korçë-Dardhë (km 9+00): shkarje anësore e trupit të rrugës, situata po monitorohet.
– Përmet-Tre Urat (Ura e Petranit): shkarje masive aktive, zgjerim i çarjes rreth 10 cm.
– Librazhd-Qafë Thanë: rrëshqitje dherash, pastrimi në proces.
– Skuraj-Peshkopi: rënie gurësh dhe inertesh, pastrim nga grupet e punës.
– Dushaj-Lekbibaj: rënie masivi shkëmbor në orët e para të mëngjesit, qarkullimi vijon me kujdes.
– Shkalla e Zezë (Gjirokastër): rrugë njëkalimshme, kërkohet vëmendje e shtuar.
– Llogara: ka mjegull të dendur.
Autoriteti Rrugor Shqiptar thotë se pavarësisht motit të keq, kontraktorët me mjete dhe punëtorë janë në terren pa ndërprerje për të bërë pastrimin e akseve rrugore.
Drejtuesit e mjeteve apelohet të kenë kujdes të shtuar gjatë drejtimit të mjetit, të reduktojnë shpejtësinë për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore.
