Edhe pse qeveria kishte paralajmëruar një ndalim njëvjeçar të TikTok në Shqipëri, platforma është sërish aktive në vend. Që prej mëngjesit të sotëm, përdoruesit kanë akses të plotë në aplikacion pa pasur nevojë për VPN, duke ngritur pikëpyetje mbi zbatimin dhe vazhdimësinë e masës së ndalimit.
Aktualisht, nuk ka asnjë reagim zyrtar nga institucionet shtetërore mbi këtë zhvillim. Po ashtu, mbetet e paqartë nëse TikTok ka ndërmarrë ndonjë hap konkret për të përmbushur kërkesat e autoriteteve shqiptare lidhur me sigurinë e përmbajtjes dhe mbrojtjen e të miturve, apo nëse aksesimi i platformës është thjesht rezultat i një rihapjeje pa marrëveshje apo garanci të reja.
Situata bëhet edhe më e paqartë në sfondin e një vendimi të fundit të Gjykatës Kushtetuese, e cila pranoi të shqyrtojë kërkesën e Asociacionit të Gazetarëve Shqiptarë për anulimin e vendimit të qeverisë, por refuzoi pezullimin e përkohshëm të masës. Ky vendim nënkuptonte se ndalimi duhet të mbetej në fuqi deri në një vendim përfundimtar.
Kryeministri Edi Rama ishte shprehur më herët me tone të ashpra ndaj TikTok, duke e përshkruar si “rrugaçi i lagjes që është në telefon” dhe duke theksuar se “TikTok në Republikën e Shqipërisë nuk do ketë për një vit”. Ai kritikoi ashpër përmbajtjen që qarkullon në platformë, duke e cilësuar si të mbushur me “rrugaçëri, perversitete dhe llum”.
Megjithatë, faktet e sotme tregojnë një realitet tjetër: TikTok është i aksesueshëm në të gjithë territorin e Shqipërisë dhe duket se ndalimi nuk është më në fuqi — të paktën në praktikë. Përballë kësaj situate, institucionet përkatëse vijojnë të heshtin.
