Pakistani ka ndërmarrë një sulm ajror në territorin e Afganistanit në orët e para të mëngjesit të së dielës, duke goditur disa zona përgjatë “Vijës Durand”, kufiri mes dy vendeve.
Sipas burimeve të sigurisë pakistaneze, gjatë operacionit janë vrarë të paktën 13 militantë të grupit Tehrik-i-Taliban Pakistan, ndërsa disa të tjerë kanë mbetur të plagosur.
Avionët luftarakë të Forcave Ajrore të Pakistanit shënjestruan, sipas autoriteteve, strehime të dyshuara të militantëve në lindje dhe juglindje të Afganistanit. Shpërthime të shumta u raportuan veçanërisht në distriktin Barmal, në provincën Paktika, ku besohet se janë goditur tetë objektiva.
Në një deklaratë zyrtare, Ministria e Informacionit e Pakistanit konfirmoi se sulmet kishin në shënjestër persona që, sipas saj, janë përgjegjës për një valë të fundit atentatesh në Pakistan. Autoritetet pretendojnë se kanë “prova bindëse” se këto sulme janë orkestruar nga militantë që veprojnë nga territori afgan.
Qeveria pakistaneze ia ka atribuuar sulmet e fundit vetëvrasëse në Islamabad, si dhe në zonat Bajaur dhe Bannu, grupeve që i konsideron të lidhura me militantë afganë dhe me elementë të të ashtuquajturit Shteti Islamik.
