Prurjet e lumit Vjosë janë rritur me shpejtësi gjatë orëve të fundit, duke rrezikuar përmbytje në disa fshatra të bashkisë Fier përgjatë shtrirjes së lumit.
Kreu i bashkisë Fier, Armando Subashi, në një prononcim për mediat bëri të ditur se niveli i prurjeve në Memaliaj ka arritur kuotën e 6 metrave dhe vijon të rritet. Sipas tij, nga përvoja e viteve të mëparshme, sapo niveli i ujit i afrohet shifrës 6.5 metra, rreziku për zonat e Fierit rritet ndjeshëm.
Subashi theksoi se të gjitha zonat e ekspozuara ndaj rrezikut po monitorohen në mënyrë të vazhdueshme dhe u bëri apel banorëve të nisin evakuimin e bagëtive nga stane të ndërtuara pranë lumit, për të shmangur dëmet e mundshme.
Emergjencat civile pranë bashkisë Fier janë pozicionuar në terren, veçanërisht pranë Urës së Mifolit, për të ndërhyrë menjëherë në rast se lumi del nga shtrati.
Ndërkohë, hidrovorët po punojnë me kapacitet të plotë dhe nuk raportohet asnjë problem me furnizimin me energji elektrike.
Në vijim priten njoftime të tjera zyrtare në varësi të situatës hidrometeorologjike.
