Duke filluar nga ky vit, fëmijët në Spanjë do të mësojnë në shkolla rreth zjarreve në pyje, përmbytjeve, tërmeteve, shpërthimeve vullkanike, në mënyrë që të përgatiten për ndikimin në rritje të ndryshimeve klimatike. Kjo parashikohet në Planin e Reagimit ndaj Emergjencave, i cili u prezantua së fundmi.
Plani 10-pikësh u miratua nga autoritetet spanjolle pasi katër persona vdiqën në zjarret e fundit në pyje dhe përmbytjet morën më shumë se 220 jetë më pak se një vit më parë. Siç shkruan Guardian, edhe fëmijët nga mosha tre vjeç do të kenë trajnim, sipas nivelit të tyre.
Sipas Ministrisë së Arsimit, qëllimi është t’u ofrojë shkollave një paketë që ofron “njohuritë, aftësitë, qëndrimet dhe vlerat e nevojshme për t’u përballur në mënyrë të sigurt dhe efektive në situata emergjente”. Përveç rreziqeve dhe fatkeqësive natyrore, do të përfshijë aksidente kimike, industriale dhe bërthamore dhe ato që lidhen me transportin e materialeve të rrezikshme.
Më shumë se 8 milionë fëmijë në 25,000 shkolla do të marrin trajnim të detyrueshëm, i cili do të ofrohet përmes videove, infografikave dhe mediave të tjera. Nxënësit e shkollës parashkollore dhe fillore do të kenë të paktën dy orë mësimi, ndërsa fëmijët më të rritur do të marrin të paktën katër orë. Rajonet spanjolle do të jenë në gjendje ta përshtatin trajnimin sipas rreziqeve të ndryshme me të cilat përballen.
“Fëmijët parashkollorë të moshës tre, katër dhe pesë vjeç do të mësojnë të njohin një alarm dhe si të dallojnë shenjat e para të rrezikut, si dhe parimet themelore të sigurisë. Fëmijët më të rritur do të mësojnë të kërkojnë lartësi në rast përmbytjeje dhe të strehohen nën një tavolinë nëse toka fillon të dridhet”, sipas Ministrisë Spanjolle të Arsimit.
Aty thuhej se studentët do të bëheshin gjithashtu të vetëdijshëm për “dallimet midis informacionit dhe dezinformimit në situata emergjente”.
Duke prezantuar këtë program në një shkollë në qytetin e Cuencës, Kryeministri Pedro Sánchez tha se qëllimi ishte përgatitja e fëmijëve dhe të rinjve për t’iu përgjigjur sa më mirë situatave “të përkeqësuara qartë nga kriza klimatike”.
