Përpara miratimit të projektligjit për “Paqen Fiskale”, Dhoma Amerikane e Tregtisë në Shqipëri (AmCham) ka shprehur kundërshtinë e saj për këtë nismë. Në një deklaratë për mediat, AmCham thekson se ky projektligj rrezikon të dëmtojë konkurrencën e ndershme në vend. Një normë tatimore e vendosur në vetëm 5% për fitimet që rriten mbi 18% krijon një hendek të thellë me normat fiskale të zakonshme, që janë 15% dhe 23% për disa kategori biznesesh.
AmCham, si një përfaqësuese e interesave të investitorëve amerikanë dhe shqiptarë, shpreh brengën e saj për aspekte të shumta ligjore dhe ekonomike të projektligjit. Një nga shqetësimet kryesore është se ai krijon avantazhe për bizneset që kanë shmangur detyrimet tatimore, duke vendosur në një pozicion të pafavorshëm ato që kanë deklaruar saktë fitimet. Sipas projektligjit, rideklarimi i pasqyrave financiare të pesë viteve të fundit lejohet pa nevojën e justifikimeve të qarta, duke rritur rrezikun e legalizimit të kapitalit me origjinë të dyshimtë.
Një tjetër problematikë është reduktimi i kontrollit tatimor gjatë periudhës së marrëveshjes, duke e bërë administratën tatimore më pak efikase. Projektligji gjithashtu pengon parimin e barazisë për tatimpaguesit dhe krijon dyshime mbi angazhimin e vendit për të përmbushur rekomandimet ndërkombëtare në luftën kundër evazionit fiskal.
AmCham kritikoi gjithashtu mungesën e transparencës dhe konsultimit publik gjatë hartimit të këtij projektligji, i cili ka implikime të ndjeshme ekonomike dhe juridike. Procesi i shpërshpejtuar i miratimit ndikon negativisht në aftësinë e bizneseve për të ofruar komente të cilësuara.
Në përfundim, AmCham kërkon rishikimin e plotë të projektligjit për të siguruar politika fiskale që garantojnë konkurrencë të drejtë, formalizimin dhe besueshmërinë e biznesit. Kjo nismë, në formën e saj aktuale, nuk arriti të përmbushë parimet e transparencës, barazisë dhe sundimit të ligjit.
