Të jesh gjyqtar futbolli nuk është një profesion i lehtë, sidomos nëse je një arbitër i nivelit ndërkombëtar, i thirrur shpesh të drejtosh gjithnjë ndeshje të vështira. Një prej tyre është italiani Daniele Orsato, i tërhequr nga sporti një vit më parë.
Tani ai mban rolin e Komisionerit për zhvillimin dhe talentin e gjyqtarëve, një lloj “kujdestari” për të rinjtë synojnë këtë profesion, por që shpesh frenohen nga episode që mund të vënë në rrezik jetën e tyre dhe të familjeve të tyre.
Vetë Orsato rrëfen një moment të tillë: “Momenti më i vështirë ishte padyshim kur pas një ndeshjeje më caktuan një eskortë për të më shoqëruar. Ishin shtatë ditë vëzhgim për mua dhe familjen time”.
“Një gjyqtar e di se duhet të përballet me protesta, është pjesë e lojës, por atë herë ishte ndryshe. Nuk isha i vetmi në qendër të stuhisë, gruaja ime dhe dy fëmijët e mi të vegjël ishin të përfshirë”, tha Orsato në një intervistë për Corriere della Sera.
“Futbolli duhet të jetë pasion, konkurrencë, por kurrë frikë. Këto gjëra nuk duhet të ndodhin në botën e sportit sepse kur mospajtimi shkon përtej kufijve të fushës dhe bëhet kërcënim, do të thotë se ne kemi humbur kuptimin më autentik të lojës”, tha Orsato.
