Kylian Mbappé po përjeton ditë të vështira në Spanjë. Pas një paraqitjeje të zbehtë dhe pa asnjë gol në dy ndeshjet çerekfinale ndaj Arsenalit, sulmuesi francez është bërë objekt kritikash të ashpra nga mediat spanjolle. Humbja e Real Madridit me rezultat të përgjithshëm 5-1 ka ndezur debatet, dhe krahasimi me legjendën Cristiano Ronaldo është kthyer në një barrë të rëndë për numrin 7 të ri të “Los Blancos”.
“Mbappé nuk është Cristiano – dhe nuk do të jetë kurrë”
Në emisionin “El Larguero” në Cadena SER, disa prej zërave më të njohur të gazetarisë sportive spanjolle nuk kursyen kritikat ndaj Mbappé. Tomas Roncero ishte i prerë:
“Kemi besuar se Mbappé do të konfirmonte në Madrid atë që ishte në Paris – kampion bote, gati për një tjetër Kupë Bote… por përveç asaj nate ndaj City kur shënoi ‘hat-trick’, nuk e shoh të jetë vendimtar. Njerëzit duan të shohin te ai një Cristiano të ri, por ai është vite dritë larg.”
Roncero shtoi se ylli francez duket i pasigurt dhe i tensionuar në fushë, duke theksuar se krahasimi me Ronaldon është i padrejtë për të dy:
“Cristiano ishte unik. Kushdo që ka menduar se Mbappé është versioni i ri i tij duhet ta harrojë këtë ide.”
Publiku i “Bernabéut” i kthen shpinën
Gazetari Antonio Romero theksoi një detaj domethënës nga momenti i zëvendësimit të Mbappé:
“Kur u largua nga fusha, stadiumi heshti. Por kur hyri Brahim Diaz, reagimi ishte ndryshe – e duartrokitën më shumë. Si për të thënë: ‘Pse nuk e futët më herët?’ Kjo është goditja më e madhe për Mbappé.”
“Fishkëllimat janë në listën e pagave të Mbappé!”
Julio Pulido shkoi edhe më tej në analizën e tij, duke thënë se publiku kishte të drejtë ta fishkëllejë francezin:
“Kur je lojtari më i mirë në botë në letër dhe vjen në Madrid, je përgjegjës për të marrë ndeshje të tilla mbi shpatulla. Por Mbappé nuk e bëri. Ai nuk ka karakterin, as lidershipin e Ronaldos – dhe nuk do ta ketë kurrë.”
“Mbappé nuk e ka zëvendësuar dot Vinicius-in”
Përtej krahasimit me Ronaldon, Romero u ndal te raporti mes Mbappé dhe Vinicius Jr.:
“Këtë sezon pritej që Mbappé të merrte stafetën si lideri i sulmit, por Real Madrid është humbës në këtë drejtim. Vini nuk është në formën e tij më të mirë, dhe Mbappé nuk ka marrë përsipër përgjegjësinë. Të krahasosh Mbappé me Ronaldon është marrëzi. Madje, edhe me Benzema është e vështirë për momentin.”
Çfarë pritet tani për Kylian Mbappé?
Lëndimi i Mbappé në kyçin e këmbës gjatë pjesës së dytë kundër Arsenal rrezikon ta lërë jashtë finales së Copa del Rey ndaj Barcelonës më 26 prill. Deri atëherë, madrilenët rikthehen në fushë më 20 prill përballë Athletic Bilbaos në La Liga.
Ndërkohë, në Madrid, gazetarët dhe tifozët presin më shumë – dhe nuk pranojnë më justifikime për emrin që u premtoi ëndrra… por po jep hijen.
