Në KQZ ka nisur përgatitja për rinumërimin e plotë të votave të zgjedhjeve të 11 majit në qarkun e Tiranës, duke kthyer procesin e numërimit në zero.
Gazetari Ergys Gjençaj, në një lidhje live me News24, bëri me dije se do të rinumërohen 1282 kuti votimi dhe pritet të përcaktohet vendi dhe koha e saktë ku do të zhvillohet ky proces, me mundësinë që ai të zhvillohet në Parkun Olimpik.
Rinumërimi do të kryhet nga punonjës të administratës së KQZ-së, duke përfshirë votat për partitë politike dhe më pas votat preferenciale. Në këtë proces do të rinumërohen edhe votat preferenciale të Koalicionit Shqipëria Madhështore në qarkun Dibër.
Ergys Gjençaj: Në KQZ ka nisur puna përsa i përket procesit të rinumërimit të votave të zgjedhjeve më 11 maj në qarkun Tiranë. Procesi i numërimit në qarkun Tiranë kthehet në zero. Është një punë e madhe kjo. 1282 kuti votimi do të rinumërohen. Pritet të përcaktohet ku dhe kur do të nisë rinumërimi. Rinumërimi mund të bëhet tek Parku Olimpik. Rinumërimi do të bëhet nga punonjës të administratës të KQZ. Do rinumërohen votat për partitë politike dhe më pas do të rinumërohen votat preferenciale. Nuk pritet që rinumërimi të nisë brenda javës. Do të rinumërohen votat preferenciale të Koalicionit Shqipëria Madhështore në Dibër.
