Romë, 5 shtator 2025 – Covid-i po rikthehet në Itali. Që në pjesën e dytë të verës ishte vënë re një rritje e rasteve, me shumë qytetarë të detyruar të qëndronin në shtrat me temperaturë të lartë pas kthimit nga pushimet. Tani, me afrimin e vjeshtës, shqetësim paraqet përhapja e variantit Stratus, i cili u shfaq fillimisht në Indi dhe tashmë është i pranishëm edhe në Evropë.
Sipas Mauro Pistellos, drejtor i Njësisë së Virologjisë në Spitalin Universitar të Pisës, «Sars-CoV-2 nuk na ka lënë kurrë dhe, si në vitet e mëparshme, në këtë periudhë pas pushimeve qarkullon më shumë, duke sjellë një rritje të lehtë të rasteve».
OBSH-ja konfirmon këtë trend, duke regjistruar rritje në vende si Greqia, Irlanda, Rumania dhe Franca. Në Itali, rritja është e përmbajtur dhe nuk paraqet ende alarm, me disa shtrime në spital tek personat mbi 80 vjeç me sëmundje shoqëruese.
Varianti dominues aktualisht është XFG, i njohur gjithashtu si Stratus, «produkt i kombinimit të mutacioneve të tjera», shpjegon Pistello. Një simptomë karakteristike e Stratus-it është zëri i ngjirur, që mund të shfaqet para shenjave klasike të Covid-19.
Sipas raportit të fundit të Ministrisë së Shëndetësisë, në javën 21-27 gusht, rastet e Covid-it në Itali ishin 1.391, krahasuar me 1.091 një javë më parë. «Tek personat e prekur po kthehen simptomat ‘e vjetra’ që i kemi njohur në fazën e parë të pandemisë», shton virologu.
Për të përballuar vjeshtën, Pistello jep këshilla të qarta: autoritetet shëndetësore duhet të fokusohen tek fushata vjetore e vaksinimit, duke promovuar vaksinën anti-Covid dhe atë anti-influenzale, ndërsa qytetarët duhet të zgjedhin vaksinimin e dyfishtë, i cili ka treguar se është i sigurt dhe efektiv.
