Kryeministri Edi Rama, i shoqëruar nga ministrja për Arsimin, Ogerta Manastirliu dhe kryetari i Bashkisë së Tiranës, Erion Veliaj, morën pjesë në përurimin e godinave 16 dhe 17 të konvikteve në Qytetin Studenti.
Rama tha se në konviktet në Paris e Londër, janë 4 veta në një dhomë, ndërsa konviktet e reja në Qytet Studenti janë me nga 2 veta në dhomë.
Kryeministri theksoi se ambicia është për të bërë gjërat që i qëndrojnë kohës për në periudhë të gjatë.
Rama: Plani i transformimit të qytetit Studenti, në një qytet studentor të shekullit të ri, vazhdon. Është një qytet që është trashëgimi e së shkuarës dhe duhet ti shërbejë të ardhmes, duhet të ofrojë për studentët kushte optimale, të njëjta me kushtet më të mira që kanë në vendet e BE. Ky konvikt këtu, që sapo pamë, është një konvikt, i cili në çdo vend të BE do të qëndronte me dinjitet në kategorinë A, jo në B. Se kudo ka A, B dhe C, ka A konvikte edhe në Paris e Londër, që janë 4 veta në një dhomë, por ka dhe konvikte që janë 2 veta në një dhomë. Këto konvikte kanë 2 veta në një dhomë. Ka konvikte edhe në vendet më të zhvilluara të BE ku dushet janë të përbashkëta për shumë njerëz, këtu çdo dhomë ka dushin e vet. Është një ambicie të bëjmë gjërat që i qëndrojnë kohës për në periudhë të gjatë, jo thjesht gjëra për sot e për nesër.
