Reshjet e dëborës kanë prekur pjesën juglindore të vendit ku në qarkun Korçë ka disa akse rrugore ku shtresa e borës ka arritur trashësi të konsiderueshme, si dhe mungesë të energjisë elektrike në disa zona.
Në segmentet Boboshticë–Dardhë dhe Lapidari Podgorie–Podgorie–Liqenas, reshjet e borës janë të shoqëruara me erë të fortë. Në Dardhë, trashësia e borës arrin në disa vende mbi 50 cm. Po punohet për pastrimin e kriposjen dhe këshillohet përdorimi i gomave dimërore dhe zinxhirëve. Momentalisht, janë vendosur në shërbim 5 borëpastruese.
Sa i përket doganës së Qafë Thanës, mësohet se është ndaluar qarkullimi i kamionëve për shkak se po punohet me borëpastruese në segmentin hyrës drejt Maqedonisë. Kjo ndërhyrje do të jetë për pak orë, çka deri më tani ka sjellë ndalimin e kamionëve por me përfundimin e ndërhyrjes nga borëpastrueset do të rinisë qarkullimi edhe për këto mjete të tonazhit të rëndë.
Në Lotin 7, në akset Libonik–Rëmbec–Plasë dhe Korçë–Voskopojë, reshjet e borës kanë arritur deri në 8 cm, të shoqëruara me erë të fortë. Akset janë pastruar dhe kriposur, ndërsa qarkullimi vijon normalisht.
Në akset Korçë–Ersekë (K.3) dhe Zëmblak–Goricë–Bilisht–Miras (K.6), gjatë natës ka pasur reshje bore. Po vijon pastrimi dhe kriposja, rekomandohet qarkullimi me goma dimërore.
Në akset Maliq–Kufi Gramsh dhe Ersekë–Leskovik–Tre Urat, gjatë natës ka pasur reshje bore dhe vijon puna për pastrimin dhe kriposjen.
Energjia elektrike është ndërprerë në këto zona:
Fideri Potgozhan, NST Guri i Kuq pa energji, rreth 500 abonentë ruralë në zonat Trebinjë dhe Bishnicë.
Fideri 8 Rehovë NST Ersekë, pa energji zona Rehovë 40 abonentë.
Fideri Vithkuq NST Rehovë, pa energji zona Mazrekë, 3 abonentë ruralë.
Fideri 9 NST Lozhan pa energji zona Mesmal, 50 abonentë ruralë.
Fideri 4 NST Mollas pa energji zona Pepellash, 5 abonentë ruralë.
Fideri 22 NST Korçë pa energji 3 abonentë privatë dhe antena në Cardhak (Stefani).
Fideri JO6 NST Leskovik, pjesërisht në punë pa energji 2 abonentë në zonën Gërmenj.
Fideri 19 NST Korçë pjesërisht në punë, pa energji zona Dardhë 140 abonentë.
Fideri 3 NST Ersekë pa energji.
Ekipet e OSSHE-së ndodhen në terren dhe po punojnë për normalizimin sa më të shpejtë të furnizimit me energji elektrike.
Ndërkohë që reshjet e borës kanë përfshirë territorin e bashkisë Pukë dhe Fushë Arrëz. Reshjet vijojnë me intensitet mesatar. Aktualisht nuk raportohet për probleme. Përgjatë segmentit rrugor Bardhet – Kryzi – Iballë duhet kujdes pasi poshtë borës ka shtresa akulli që e bëjnë të rrezikshëm qarkullimin.
Policia e Qarkullimit Rrugor u bën apel drejtuesve të mjeteve që të bëjnë kujdes teksa qarkullojnë përgjatë akseve rrugore që përshkojnë veriun e vendit, teksa nuk do të zbatohet Kodi Rrugor ndaj drejtuesve të mjeteve të cilët nuk janë të pajisur me të gjithë kushtet teknike si gomat dimërore dhe zinxhirët.
