I shpallur në kërkim në kuadër të dosjes “Metamorfoza” që prej vitit 2023, Eljon Hatos ka arritur t’i shpëtojë sërish arrestimit.
Burime për mediat bëjnë me dije se kontrolle të shumta janë kryer në zonën e Rrethinave në Shkodër në orët e mbrëmjes, por Hato sërish nuk është gjetur.
Gjithashtu mësohet se nga ky aksion janë shoqëruar për t’u marrë në pyetje rreth 6 persona, në mesin e të cilëve edhe vëllai i Eljon Hatos.
Edhe më herët RENEA ka kryer disa operacione për arrestimin e tij në Shkodër dhe Tiranë, por nuk ka mundur ta gjejë. Nuk dihet nëse operacioni është dekonspiruar, apo Hato nuk ka qenë në banesë gjatë kontrolleve.
Hato është i njohur për përfshirjen në vrasje të bujshme dhe është lidhur ngushtë me grupin e Ervis Martinajt. Në vitin 2018, ai mbeti i plagosur në një përleshje me armë, dhe më herët u akuzua për vrasje dhe përpjekje për të porositur një tjetër vrasje.
