Liverpooli ka bërë goditjen më të madhe të merkatos së verës me transferimin e Florian Wirtz nga Bayer Leverkusen për 136 milionë euro, duke vendosur një rekord të ri për klubin dhe për Premier League.
22-vjeçari konsiderohet një nga talentet më të mëdhenj të brezit të tij dhe është parë nga drejtuesit e “The Reds” si një lojtar kyç për hapjen e një cikli të ri fitues në Anfield në krah të yjeve si Salah dhe Van Dijk.
Wirtz vjen pas një sezoni të jashtëzakonshëm me Leverkusenin, ku udhëhoqi skuadrën drejt fitimit të Bundesligës, Kupës dhe Superkupës së Gjermanisë, dhe u dallua gjithashtu në Evropian me përfaqësuesen gjermane, edhe pse “Die Mannschaft” u ndal në çerekfinale.
Por ndryshe nga dominimi në fushë, debutimi i tij në rrjetet sociale me fanellën e Gjermanisë shkaktoi një valë reagimesh që ai vetë nuk i priti mirë. Në një video virale, Wirtz renditi “patatet e pjekura të thjeshta” si ushqimin e tij të preferuar me bazë patateje – zgjedhje që nxiti të qeshura e meme në rrjet. Megjithatë, sulmuesi nuk e mori me humor: “Nuk e gjej qesharake. Më duket se njerëzit thjesht u tallën me mua. Unë i qëndroj zgjedhjes sime, ende më pëlqejnë patatet.”
Pavarësisht kësaj, Wirtz mbetet i përqendruar në objektivat e tij te Liverpool. Ai pritet të luajë si numri 10 në formacionin 4-2-3-1 të trajnerit Slot dhe të sjellë kreativitet e efikasitet para porte. Me shifra dyshifrore për gola dhe asiste në dy sezonet e fundit, ai është ndër të paktët në Evropë që i ka arritur këto nivele krahas Mohamed Salah.
Transferimi i tij ka nisur edhe një revolucion te Liverpooli: largimet e pritshme të Darwin Nuñez dhe Federico Chiesa, afrimi i Jeremie Frimpong nga Leverkusen për 35 milionë euro, dhe interesimi për mbrojtësin e majtë Milos Kerkez, janë sinjale të qarta se “Reds” po blejnë për të sunduar Premier Leaguen edhe për shumë vite të tjera.
