Një infermier 39-vjeçar nga Memaliaj është vënë nën hetim penal për veprën penale “Shpërdorimi i detyrës”, pas dyshimeve se ka regjistruar në mënyrë fiktive një pacient të dënuar me masën e sigurisë “arrest në shtëpi”.
Sipas njoftimit zyrtar të Policisë shtetasi R. S., banues në Tepelenë, dyshohet se më datë 13 shtator 2025, në cilësinë e infermierit në një qendër shëndetësore, ka shënuar në librin e shërbimeve emrin e shtetasit E. K., i cili ishte arrestuar po atë ditë për thyerje të masës së sigurisë.
Hetimet e kryera nga Specialistët për Hetimin e Krimeve në Stacionin e Policisë Memaliaj kanë çuar në referimin e materialeve në Prokurori, ku është regjistruar procedimi penal ndaj infermierit.
Dyshohet se veprimi i tij ka pasur për qëllim krijimin e një alibie për të dënuarin, duke e paraqitur si të pranishëm në institucionin shëndetësor në kohën kur ai nuk duhej të largohej nga banesa.
