Real Madrid prej kohësh është në kërkim të një mesfushori për sezonin e ri dhe në listën e gjatë të kandidatëve njëri prej tyre është edhe Angelo Stiller, mesfushori gjerman që ka bërë një super sezon më Stuttgart, duke ngjallur interesin e shumë klubeve të mëdha.
24-vjeçari pëlqhet shumë nga Xabi Alonso, tekniku spanjoll iu ka kërkuar drejtuesve të Real Madrid të bëjnë të mundur transferimin e Stiller në Madrid, por në anën tjetër propozimi i Stuttgart duket i vështirë për t’u pranuar nga “Los Blancos”.
“Defensa Central” raporton se Stuttgart ka pranuar lirimin e Angelo Stiller por në këmbim të tij ka kërkuar dy lojtarët e rinj mjaft premtues të Real Madridit, njëri është Raul Asencio, ndërsa tjetri është Nico Paz, i cili ka shkëlqyer me Como në Serie A dhe “Los Blancos” kanë ende të drejtën për ta rikthyer atë në Madrid, sipas marrëveshjes që bënë dy klubet verën e kaluar.
Sipas raportimit në fjalë, klubi madrilen është i gatshëm të paguajë një shifër ekonomike që Stuttgart kërkon, por në asnjë mënyrë të përfshijë në marrëveshje dy lojtarët si Raul Asencio dhe Nico Paz. Gjithsesi, përveç Stiller, Real Madrid është duke ndjekur edhe mesfushorë të tjerë.
