Real Madrid i Xabi Alonsos po dominon statistikat e Champions League, por jo tabelën e golave. Madrilenët kanë regjistruar plot 76 goditje drejt portës, më shumë se çdo skuadër tjetër në kompeticion, por kanë arritur vetëm 8 gola të shënuar – një përqindje suksesi prej 10.5%.
Nga këto, 5 gola mbajnë firmën e Kylian Mbappé, që po mban mbi supe repartin ofensiv. Në “Santiago Bernabéu”, shifrat janë edhe më shqetësuese: 56 tentativa për vetëm 3 realizime, që do të thotë një gol për çdo 19 goditje – diçka e pazakontë për standardet e Real Madridit.
Fitorja e thellë në Kazakistan maskoi përkohësisht problemin, pasi aty u shënuan 63% e golave të skuadrës dhe u godit me efikasitet 25%. Por në ndeshjet e tjera, ekipi i Alonsos ka treguar mungesë të theksuar qartësie para portës.
Vinicius, Rodrygo dhe Mastantuono janë ende pa gol në Champions, ndërsa shifrat e expected goals për sulmuesit kryesorë mbeten të ulëta. Ndërkohë, portierët kundërshtarë kanë shkëlqyer: në tre ndeshjet e para, çdo kundërshtar i Realit ka bërë të paktën 7 pritje, një tjetër tregues se diçka mungon në finalizim.
Real Madrid i Xabi Alonsos po krijon shumë, por vuan ta “mbyllë” ndeshjen – një simptomë që, për momentin, nuk është alarm, por padyshim një diagnozë për t’u trajtuar.
