Javier Tebas, presidenti i Ligës Spanjolle, ka ngjallur shumë polemika me deklaratat e tij të fundit për mediat vendase, ku ka sulmuar Real Madridin dhe Barcelonën. Bëhet e ditur se marrëdhënia e Tebas me presidentin e Real Madridit, Florentino Perez është shumë e tensionuar, ndërsa së fundmi është përkeqësuar edhe me presidentin e Barçës, Joan Laporta.
Pavarësisht pozicionit të tij të ndjeshëm, Tebas foli qartë dhe çiltër në një intervistë televizive për krizat e La Ligës për shkak të Real Madridit dhe Barcelonës.
“Të gjitha klubet ankohen për arbitrimin, por Real Madrid e thekson shumë këtë çështje dhe tregon histori mashtruese. Jam i sigurt se një numër i madh i tifozëve të klubit nuk pajtohen me atë që menaxhmenti po bën. Real Madrid është bërë një klub që ankohet dhe qan gjatë gjithë kohës, ata qajnë për ndeshjen e tyre të radhës, ata do të vazhdojnë të qajnë para çdo ndeshjeje dhe të gjitha për shkak të një komploti të supozuar”, shtoi Tebas.
“Nëse bëni një referendum, klubet do të thonë se Real Madrid dhe Barcelona përfitojnë më së shumti nga gabimet e arbitrave, por ata nuk kanë një kanal televiziv për ta thënë këtë, kanali i Real Madridit është i vetmi që flet për këtë çështje”, vazhdoi Tebas.
Lidhur me rastin e Barcelonës dhe ish-zëvendëspresidentit të komitetit të arbitrave, Negreira, Tebas tha “Kemi kërkuar që çështja të referohet në gjykatë sepse besojmë se ka prova të mjaftueshme për të konfirmuar se Barcelona ka kryer një krim të korrupsionit sportiv”.
Ai vazhdoi, duke iu përgjigjur mundësisë së rënies së Barcelonës nga La Liga nëse akuza vërtetohet, “Jo, unë nuk bëj ligje sportive dhe duhet të respektoj atë që parashikon ligji i sportit, në këtë rast, parashkrimi i krimeve është 3 vjet dhe ne nuk mund të shpikim një statut tjetër, kështu që nuk do të ketë rënie”.
Tebas pohoi se është tifoz i Real Madrid, por jo i Florentino Perez, për të cilin ka kritika të mëdha. “Jam i lumtur kur Real Madrid fiton dhe isha shumë i lumtur kur ata fituan Ligën e Kampionëve, por thjesht nuk jam një tifoz i Florentino Perez. Nuk mund ta imagjinoj La Ligën pa Real Madridin, por Florentino Perez është një person kokëfortë dhe kurrë nuk dëshiron të humbasë.
Futbolli që promovon Florentino Perez u shërben disa klubeve të pasura, ai përfaqëson futbollin vetëm për të pasurit, ai dëshiron të kontrollojë gjithçka, veçanërisht paratë”, përfundoi Tebas.
