Një raport i Kombeve të Bashkuara ka zbuluar rënien e lindjeve në Shqipëri, duke theksuar se popullsia po plaket dhe po tkurret.
Sipas këtij raporti, emigracioni është shkaku kryesor i uljes së lindjeve. Parashikohet që deri në vitin 2054, numri i lindjeve do të përgjysmohen, duke kaluar nga 22 mijë bebe në 2024 në rreth 10-11 mijë në 2050.
Shqipëria renditet e para në botë për numrin e lindjeve të humbura për shkak të emigracionit. Sociologët e shohin këtë situatë si një shqetësim, duke paralajmëruar për pasoja të shumëfishta. Ata thonë se pasojat do të ndihen në tkurrjen e popullsisë, uljen e numrit të martesave dhe plakjen e shoqërisë.
Sipas projeksioneve të Kombeve të Bashkuara, të gjitha vendet e rajonit do të përjetojnë një rënie të lindjeve për shkak të emigracionit të grave. Në vendet me norma të ulëta fertiliteti, çiftet nuk po zëvendësojnë dot popullatën. Italia dhe Greqia janë dy përjashtime, pasi ende kanë një rritje të lindjeve nga emigrantët.
