Ramazan Rraja, nipi i ish-deputetit socialist Rrahman Rraja, ka lënë përkohësisht qelinë e paraburgimit në Fushë-Krujë. Arsyeja e daljes së tij nga burgu lidhet me përkeqësimin e gjendjes shëndetësore të nënës së tij.
Sipas gazetares Klodiana Lala, Rraja është shoqëruar nga forcat speciale dhe qëndrimi i tij jashtë qelisë ka zgjatur vetëm rreth 40 minuta.
Ramazan Rraja ndodhet aktualisht në burg për atentatin ndaj ish-prokurorit Arjan Ndoja. Bashkë me të, në burg ndodhet edhe babai i tij, Xhelal Rraja.
Ai është një figurë e njohur në botën e krimit të organizuar në Shqipëri dhe është i përfshirë në disa ngjarje kriminale të rëndësishme, përfshirë atentatin e vitit 2019 që rezultoi me vrasjen e shoferit të ish-prokurorit Ndoja.
Në vitin 2023, Rraja u arrestua me një armë të fshehur në brez, ndërsa në Belgjikë është i dënuar me 12 vite burg për trafik droge. Përveç këtyre, ai ka tentuar të korruptonte efektivë policie me një shumë prej 1 milion eurosh për t’u liruar.
