Kryeministri Edi Rama ka dërguar urime për komunitetin hebre me rastin e Vitit të Ri, Rosh Hashanah, duke vënë theksin mbi rëndësinë e paqes dhe qytetarisë.
Në mesazhin e tij, Rama shpreh dëshirën që ky vit i ri të sjellë kthimin e të dashurve për këdo që ka humbur ndonjëherë, duke theksuar se qytetaria duhet të mbizotërojë mbi dhunën dhe egërsinë.
Ky urim vjen vetëm një ditë pas sulmeve iraniane me raketa ndaj Izraelit, të cilat janë dënuar nga Shqipëria.
Rama shpreh solidaritet ndaj hebrenjve “në këtë periudhë reflektimi dhe festimi, duke kërkuar që paqja dhe harmonia të triumfojnë mbi tensionet dhe konflikti.”
Rosh Hashanah, si një festë dyditore, përfaqëson fillimin e vitit të ri hebre dhe është një moment i veçantë reflektimi për shumë njerëz. Në këtë periudhë, hebrenjtë bëjnë një bilanc të vitit që kaloi dhe vendosin për qëllime të reja për vitin e ri.
