Lori Hoxha, një nga trashëgimtaret e ish-pronarit të ndjerë të Top Channel, Dritan Hoxha, ka hyrë së fundmi në radhën e “invesitorëve strategjikë”, me lejen e kryeministrit Edi Rama, sipas dokumentave të konsultuar nga “Boldnews.al”.
32-vjeçarja Hoxha, e cila është personazhi kryesor në drejtimin e televizionit Top Channel, ka marrë bekimin e kreut të qeverisë për të ndërtuar një strukturë të kombinuar hoteliere dhe strukturash shërbimi në qytetin e Tiranës.
Në foto: Lori Hoxha, një nga pronaret e Top Channel
Vendimi është marrë nga Komiteti i Investimeve Strategjike në 10 Prill 2025, rreth një muaj para zgjedhjeve parlamentare, ku Top Channel, si përherë, u rreshtua në krah të kryeministrit Edi Rama.
Kompania përfituese e statusit të “investitorit strategjik” është “Anima Con” shpk. Shoqëria është krijuar në qershor të vitit 2022 nga nëna e Lori, Vjollca Hoxha, vejusha e Tan Hoxhës.
Në foto: Kontrata e dhurimit të “Anima Con” mes Vjolla Hoxha dhe vajzës së saj, Lorela Hoxha
Sipas dokumentave të konsultuar nga “Boldnews.al”, Vjollca Hoxha ia dhuron kompaninë vajzës së saj, Loreta Hoxha, në janar të vitit 2025. Më pas, shoqëria “Anima Con” aplikon për statusin e “investitorit strategjik”.
Lori strategjike
Komiteti i Investimeve Strategjike, nën drejtimin e kryeministrit Edi Rama, ka miratuar vendimin nr.1, dt. 10 Prill 2025 “Miratimin e statusit “Investim/investitor strategjik procedurë e veçantë” për projektin e investimit “Anima”, me subjekte aplikues “Anima con” shpk dhe “Eb Construction”.
Së bashku me kompaninë e Lori Hoxhës, në këtë “investim strategjik” është përfshirë edhe “EB Construction”, në pronësi të Ilir Bregasit, djali i biznesmenit të afërt me Partisë Socialiste, Luan Bregasi.
Në foto: Vendimi për shpalljen “investitor strategjik” të shoqërisë “Anima Con”
Sipas vendimit të nënshkruar nga kryeministri Edi Rama dhe të kundërfirmosur nga të paktën 5 ministra të kabinetit të tij, “projekti i investimit “ANIMA” parashikon ndërtimin e një kompleksi me funksion të përzier si hotel, rezidencial, godina banimi dhe shërbimesh, në Bashkinë Tiranë”.
Vendimi i Ramës nuk përmend as vlerën e investimit dhe as zonën se ku do të zhvillohet kompleksi i pritshëm hotelier dhe rezidencial.
Gaztorët investitorë
Ligji për “Investimet strategjike”, i miratuar fillimisht në vitin 2015 me efekt 5-vjeçar, por që më pas u shty disa herë, kishte si synim të shpallur nga kryeministri Rama thithjen e kompanive të huaja për të investuar në sektorë të rëndësishëm të vendit, e kryesisht në turizëm.
Por, gjatë zbatimit të tij, statusi i “investitorit strategjik” iu dha kryesisht biznesmenëve shqiptarë, përfshirë edhe gaztorë të oborrit kryeministror.
Ndër “investitorët strategjikë” shqiptarë mund të përmendet gaztori Gazmend Paja, i njohur për pjesëmarrjen në prograbim kabare “Portokalli” në Top Channel, i njohur për raportet shumë të ngushta me kryetarin e arrestuar të Bashkisë së Tiranës, Erion Veliaj.
Në foto: Kryebashkiaku i arrestuar i Tiranës, Erion Veliaj dhe “investitori strategjik”, Gazmend Paja
Po ashtu, “investitor strategjik” është shpallur edhe ish-këngëtari dhe producenti i emisioneve televizive, Turjan Hyska.
Tashmë, në radhën e investitorëve strategjikë nga fusha e medias, u përfshi edhe Lori Hoxha, një nga drejtueset kryesore të televizionit “Top Channel”.
