Një reagim i ashpër ka ardhur ndaj deklaratave të ish-eurodeputetit britanik, Nigel Farage, i cili së fundmi ka shtuar akuzat ndaj komunitetit shqiptar në Mbretërinë e Bashkuar, duke përdorur shifra të pasakta për përfshirjen e tyre në krime.
Pasi fillimisht pretendoi se “një në pesëdhjetë shqiptarë është kriminel”, Farage ka vijuar retorikën e tij me deklarata të pasigurta si: “Ndoshta është një në tre, ndoshta një në katër, nuk e di…”. Kjo ka shkaktuar reagime të ashpra nga komuniteti shqiptar dhe jo vetëm.
Në një përgjigje publike, përfaqësues të diasporës shqiptare në Britani kanë theksuar se deklaratat e Farage nuk bazohen në të dhëna reale. “Ju pretendoni se i keni kontrolluar dy herë shifrat, por vetë artikulli i ‘The Telegraph’, që përdorni si referencë, pranon se analiza mund të ketë nënvlerësuar numrin e shqiptarëve në Britani”, thuhet në reagim.
Sipas të dhënave të Ambasadës së Shqipërisë në Mbretërinë e Bashkuar, numri i shqiptarëve që jetojnë dhe punojnë në Britani është mbi 300,000, një shifër shumë më e lartë se ajo prej 53,000 që është përmendur në disa media. “Këta janë njerëz që mësojnë fëmijët tuaj, që ndërtojnë shtëpitë tuaja, që kujdesen për të moshuarit dhe të sëmurët tuaj,” theksohet më tej.
Deklaratat e Farage janë cilësuar si “taktika frikësimi të maskuara si statistika”, që përpiqen të përçajnë opinionin publik përmes miteve dhe jo fakteve. Reagimi përfundon me një ftesë të hapur për Farage-n për të vizituar Shqipërinë, për të njohur realitetin dhe mikpritjen shqiptare, duke u shprehur: “Shpresojmë që vizita juaj në Shqipëri t’ju frymëzojë të luftoni për ide, në vend që të luftoni kundër njerëzve.”
