Një përfaqësuese e komunitetit rom mund të bëhet pjesë e qeverisë së ardhshme të drejtuar nga Edi Rama, nëse Partia Socialiste fiton zgjedhjet e 11 majit. Lajmi u bë i ditur nga vetë kryesocialisti gjatë një takimi me gra dhe vajza në qytetin e Korçës.
“Një vajzë nga Delvina, që përfaqëson vajzat e margjinalizuara, jo vetëm që mund të jetë një zë i rëndësishëm në Kuvendin e Shqipërisë, por edhe nëse nuk do të jetë në Parlament, do të ketë një rol të padiskutueshëm në qeverinë tonë të ardhshme,” u shpreh Rama.
Ai theksoi edhe njëherë rëndësinë e grave në shoqëri dhe në politikë, duke nënvizuar kontributin e tyre në nisma të rëndësishme si mbyllja e TikTok në Shqipëri.
“E kam thënë edhe më par, nuk jam i sigurt nëse do kishim arritur ta mbyllnim TikTok pa mbështetjen e plotë të grave. Po të ishte vetëm çështje burrash, kam frikë se nuk do kishte ndodhur kjo mbështetje kaq e gjerë për mbrojtjen e fëmijëve nga rreziqet që sjell kjo platformë,” tha ai.
Me humorin që e karakterizon, Rama nuk i kurseu as batutat me gratë dhe vajzat e pranishme, duke iu bërë thirrje që të mos krijojnë “krushqi” me opozitën.
“Krushqia me çdo demokrat varet nga një gjë: je me BE-në apo me kënetën? Nëse je me BE-në, urime dhe të trashëgoheni! Nëse je me kënetën – më fal, por nuk ka vajzë për ty!” përfundoi Rama, duke përshëndetur gratë e Korçës, Pogradecit, Maliqit, Pustecit, Devollit dhe Kolonjës.
