Kryeministri Edi Rama ka zhvilluar në Cërrik një bashkëbisedim me fermerë e sipërmarrës në fushën e bujqësisë për të dëgjuar problemet dhe idetë e tyre si dhe për të ngritur një urë të re bashkëpunimi në funksion të rrugës së anëtarësimit të Shqipërisë 2030 në BE. Në takim e pranishme është ministrja e Bujqësisë, Anila Denaj, si edhe ai i financave, Petrit Malaj, por edhe fermerë e sipërmarrës.
Rama: Arsyeja pse jemi mbledhur ka të bëjë me nevojën tonë për të dëgjuar nga afër këndvështrimet tuaja sipas fushave të ndryshme të aktivitetit në këtë hapësirën e madhe të zhvillimit rural. Dua të them që arsyeja pse e kemi ndërtuar këtë diskutim në një formë tjetër është pikërisht sepse duam që diskutimi të shtrihet në çdo detaj dhe që opinioni juaj të mund të shtjellohet plotësisht në një hapësirë informale. Kjo ka munguar dhe na mungon dhe patjetër që pas këtij diskutimi do mundohemi të gjejëm rrugët se si ky kontakt të jetë më i frutshëm, më garantues për dëgjimin e zërit tuaj edhe patjetër edhe më i dobishëm në funksion të politikave dhe të vendimmarrjeve tona. Qëkur është bërë reforma administrtive territoriale dhe bashkitë janë zgjeruar, në vend që kjo të sillte një rritje të vëmendjes dhe mundësive për fermerët dhe sipërmarrjen në fshat ka sjellë një shkëputje. Kryetarët e bashkive e shikojnë fshatin si çështje të urbanizimit, pastrimit, ndriçimit, por nuk e shikojnë si pjesë të punës së tyre të përditshmë në funksion të zhvillimit.
Rama tha se jemi në një pikë ku duhet të garantohet një kthesë në këtë drejtim, pasi sot nuk kemi ende asnjë ndërmarrje të vetme bujqësore të krijuar me kontributin dhe bashkëpunimin e fermerëve, sipërmarrësve dhe stukturave të pushtetit vendor. Edhe pse janë bërë disa tentativa, nuk mund të thuhet se është krjuar një model, tha kreu i qeverisë. Ai u ndal edhe te fondi prej 250 milionë eurosh i vënë në dispozicion të bujqësisë nga Banka e Shqipërisë.
Rama: Kemi vendosur një linjë të re kredie nga Banka e Shqipërisë, 250 mln euro që është një shumë kolosale për t’iu përgjigjur ambicieve dhe për t’i dhënë mbështetje projekteve në fshat. Na duhet një bashkëpunim më i afërt me protagonistët që janë në fushën e përpjekjes së përditshme në fshat dhe na duhet një plan për të ndërtuar modelet e duhura. Shpresoj që nga kjo bisedë e sotme të çelim një kapitull të ri bashkëpunimi dhe ndërveprimi me territoret në të cilat zhvillohet jeta e fshatit. Është edhe Paketa e Maleve që rrezikon të mbetet e pashfrytëzuar nëse ne nuk ndërtojmë mekanizmat e duhur. Çfarë bëhet mirë për vendin është bashkim i kontributeve të të gjithëve. Nëse ne arrijmë të bëjmë më shumë dhe më mirë që ju të bëni më shumë dhe më mirë, bashkimi e bën Shqipërinë që të jetë më e mirë. Për këtë aryse mendoj që baza e këtij takimi duhet të jetë të qenit krejt të hapur në raport me arsyen pse jemi mbledhur, pa asnjë rezervë, pa asnjë dorashkë. Çfarë mendoni se duhet të bëjmë ne, sepse në suksesin tuaj roli ynë është shumë më i vogël se sa duhet të jetë.
