Kreu i qeverisë Edi Rama, ka komentuar për herë të parë protestën e dhunshme të 7 tetorit, të organizuar nga opozita.
Në podkastin e tij “Flasim”, duke folur për arsimin dhe studentët, u ndal te dy protestat që sipas tij, kanë qenë vërtet të tilla, ajo e armëve kimike dhe ajo e studentëve.
Sipas shefit të qeverisë, protestat e tjera të organizuara nga opozita janë manifestime politike për interesa për pushtet.
Edi Rama: Dy protesta ka pasur Shqipëria sa kam qenë unë, të tjerat nuk janë protesta, janë shfaqje, manifestime politike për interesa për pushtet. Nuk janë protesat qytetare, janë protesta partie. Ka një traditë protestash në Shqipëri, e kemi bërë dhe ne kur kemi qenë në opozitë. Ato nuk janë protesta të shoqërisë, janë organizime partish, mbledhin njerëz.. dy protesta mbaj mend unë, një ajo e armëve kimike, ka qenë sapo unë kam filluar dhe protesta e studentëve. Kishte një ndjeshmëri të brendshme që i sillte njerëzit atje, kishte një elektrizim që shtonte me minuta, jo me orë numrin e njerëzve të përfshirë. Në protestën e dytë një tjetër element i studentëve ishte që nxori jashtë elementët politikë.
