Qytetarët që udhëtojnë nga Greqia drejt Shqipërisë përmes pikës kufitare të Qafë-Botës janë përballur këtë mesditë me radhë të gjata dhe vonesa pritjeje për më shumë se një orë.
Sipas burimeve zyrtare, aktualisht pala greke po operon me vetëm dy sportele, ku janë të pranishme tre punonjëse doganore të transferuara nga pika kufitare Kakavijë. Ndërkohë, pala shqiptare në Qafë-Botë vijon punën me tre sportele të hapura.
Situata është krijuar pas arrestimit të 14 punonjësve të doganës greke, përfshirë shtatë burra dhe shtatë gra, mes tyre edhe shefi i njësisë. Autoritetet greke njoftuan se punonjësit e ndaluar janë pjesë e një hetimi mbi një grup të dyshuar të organizuar kriminal, i cili akuzohet për marrje të parregullt përfitimesh financiare në këmbim të moskryerjes së kontrolleve doganore.
Sipas policisë greke, hetimi është mbështetur në mbi 2,000 faqe dokumentacion dhe prova duke përfshirë materiale video, fotografi dhe biseda të regjistruara midis të dyshuarve dhe personave të tjerë.
Autoritetet shqiptare po ndjekin situatën nga afër dhe pritet që fluksi i udhëtarëve të stabilizohet pas riorganizimit të stafit në anën greke të kufirit.
