Astrit Hysenaj, 54 vjeç, u gjet i pajetë në ditën e tretë të përmbytjeve në Durrës, pasi ishte nisur për në punë, por nuk u kthye më në banesë. Trupi i tij u gjet në një kanal kullues, në zonën e ish-repartit ushtarak pranë Plepave.
Detaje tronditëse janë bërë publike nga djali i xhaxhait të viktimës, Osman Hysenaj, i cili deklaron se familja disponon pamje filmike nga kamerat e sigurisë që dokumentojnë momentet e fundit të 54-vjeçarit. Sipas tij, Hysenaj ka qenë në krye të detyrës deri në çastet e fundit të jetës.
Në pamjet filmike, rreth orës 08:30 të mëngjesit, ai shihet duke pastruar kanalet kulluese nga plehrat, me ujin që i arrinte deri në gju, në kushte të vështira moti dhe reshje intensive.
“Familja nuk ishte dakord që të shkonte në punë për shkak të motit të keq, por ai veshi uniformën dhe u nis si çdo ditë. Kur nuk u kthye në orarin e zakonshëm, u shqetësuam, por menduam se mund të ishte dërguar nga ndërmarrja në ndonjë zonë tjetër. Vetëm në mbrëmje njoftuam policinë,” tregon Osman Hysenaj.
Sipas tij, kërkimet vijuan edhe ditën pasuese, ndërsa dëshmitë dhe pamjet filmike tregojnë se deri në orën 08:25, Astrit Hysenaj ishte duke kryer detyrën e tij. Dyshohet se ai është marrë nga rrjedha e ujit dhe ka përfunduar në kanalin kullues, ku edhe u gjet pa shenja jete.
“Te ura pranë ish-repartit ushtarak në Plepa, dëshmitarë kanë parë një uniformë punonjësi komunal. Aty e gjetëm. Ai ra në krye të detyrës,” shton familjari i viktimës.
Familja e Astrit Hysenajt kërkon që të zbatohen detyrimet ligjore që u takojnë në raste të tilla, pasi viktima ka lënë pas një nënë 85-vjeçare, bashkëshorten e papunë dhe një djalë, ndërsa të ardhurat e vetme të familjes janë pensioni i të moshuarës.
Ngjarja ka ngjallur reagime dhe ka rikthyer vëmendjen te kushtet e vështira dhe rreziku me të cilin përballen punonjësit e shërbimeve publike gjatë situatave emergjente.
