Një sasi e dyshuar eksplozivi është zbuluar mbrëmjen e sotme në zonën e njohur si “Veliera”, përgjatë bulevardit Epidamn në Durrës. Policia është njoftuar nga kalimtarë të rastit, të cilët raportuan për praninë e një objekti të dyshimtë në një nga zonat më të frekuentuara të qytetit bregdetar.
Sipas burimeve jozyrtare, dyshohet se bëhet fjalë për një lëndë plasëse, e identifikuar fillimisht nga shërbimet policore që mbërritën në vendngjarje pas raportimeve të qytetarëve.
Menjëherë pas konstatimit, forcat e rendit vendosën të izolonin zonën përreth, duke bllokuar rrugën Egnatia, sheshin tek Veliera dhe segmentet pranë bulevardit Epidamn me shirita sigurie, për të shmangur rrezikun dhe për të mbrojtur sigurinë e qytetarëve.
Në terren u raportua një prani e shtuar e forcave të policisë dhe automjeteve të tyre, të cilat po monitorojnë situatën dhe po marrin masat e nevojshme për të parandaluar çdo incident të mundshëm.
Ndërkohë, autoritetet janë në pritje të mbërritjes së forcave xhiniere dhe ekspertëve të njësive antieksploziv nga Tirana, të cilët pritet të kryejnë verifikimet teknike dhe të ndërmarrin masat për neutralizimin e objektit të dyshuar. Hetimet janë ende në vazhdim për të zbardhur origjinën dhe rrethanat e ngjarjes.
