Presidenti ukrainas, Volodymyr Zelensky ka bërë një deklaratë të fortë, duke thënë se Vladimir Putin “do të vdesë së shpejti” dhe se ky është një “fakt i pashmangshëm”.
Komentet e tij u bënë gjatë një konference për shtyp në Paris, ku ai i bëri thirrje Shteteve të Bashkuara dhe aleatëve evropianë të mbajnë presionin mbi Rusinë dhe të mos lejojnë që Putin të dalë nga izolimi ndërkombëtar.
Sipas The Sun, spekulimet mbi gjendjen shëndetësore të presidentit rus, i cili është 72 vjeç, janë shtuar ndjeshëm kohët e fundit.
© The Sun
Disa burime sugjerojnë se ai mund të vuajë nga kanceri apo Parkinsoni, pasi është vërejtur me simptoma si dridhje e duarve dhe këmbëve, fytyrë e ënjtur dhe të folur i paqartë. Megjithatë, Kremlini ka mohuar vazhdimisht këto pretendime.
Zelensky gjithashtu ka paralajmëruar se Putin “ka frikë nga shoqëria e tij” dhe se Rusia po përpiqet të destabilizojë Bashkimin Evropian nga brenda, duke përmendur si shembull qëndrimin pro-rus të Hungarisë. Kjo deklaratë vjen në një moment kritik, pasi liderët e BE-së po diskutojnë mënyrat për të ruajtur një front të bashkuar kundër agresionit rus.
Ndërkohë, Rusia ka vazhduar sulmet e saj të ashpra ndaj Ukrainës, pavarësisht përpjekjeve ndërkombëtare për një armëpushim të pjesshëm në Detin e Zi, të ndërmjetësuar nga SHBA. Presidenti francez Emmanuel Macron ka kritikuar Kremlinin për hipokrizi, duke e akuzuar se vazhdon të godasë objektiva civilë ndërsa deklaron se kërkon paqe.
