Kryeministri indian Narendra Modi dhe presidenti rus Vladimir Putin janë mes një grupi prej 20 liderëve botërorë që po marrin pjesë në një samit të sigurisë rajonale në Kinë. Para këtij takimi të rëndësishëm të Organizatës për Bashkëpunim të Shangait (SCO) që zhvillohet në qytetin port Tianjin, Modi po zhvillon bisedime me presidentin kinez, Xi Jinping. Kjo është hera e parë pas shtatë vjetësh që Modi viziton Kinën.
Putin, një aleat i ngushtë i Kinës, mbërriti në Tianjin me një tapet të kuq të shtruar për të. Ky samit vjen në një kohë të tensionuar, pasi presidenti amerikan Trump ka vendosur tarifa të larta mbi produktet indiane si ndëshkim për blerjen e vazhdueshme të naftës ruse nga Delhi, ndërsa Putin përballet me kërcënime sanksionesh për luftën e tij në Ukrainë. Organizatën SCO e përbëjnë 10 vende anëtare, përfshirë Pakistanin dhe Iranin, si dhe 16 partnerë dialogu dhe vëzhgues.
Samiti përbën një ngjarje kryesisht simbolike, por ofron një mundësi për liderët që të shprehin ankesat dhe interesat e përbashkëta. Këtë vit, ngjarja vjen pas ‘luftërave tregtare’ me SHBA-në. SCO u krijua nga Kina, Rusia dhe katër vende të Azisë Qendrore në vitin 2001 për të kufizuar ndikimin e aleancave perëndimore si NATO.
Ndërsa samiti po zhvillohet, qyteti Tianjin është bërë një qendër e aktivitetit me pankarta dhe billboarde që promovojnë ngjarjen. Gjatë natës, dhjetëra mijëra vizitorë lokalë kanë mbushur zonën e lumit për të parë një shfaqje ndriçimi, ndërsa rrugët janë jashtëzakonisht të ngarkuara, duke e bërë të vështirë lëvizjen. Gjatë ditës, shumë këmbësorë duhet të presin për kalimin e konvokeve të liderëve botërorë.
Shërbimet e taksive dhe automjeteve të tjera janë pezulluar në qendër të qytetit, por kjo nuk ka frenuar entuziazmin e njerëzve për këtë ngjarje historike. Policia ka këshilluar më shumë se 13 milionë banorë të Tianjin të shmangin lëvizjen dhe të qëndrojnë pranë dyqaneve për nevojat e përditshme. Takimi vjen pak ditë para një parade të madhe ushtarake që shënon 80 vjetorin e përfundimit të Luftës së Dytë Botërore.
