Policia e Korçës ka nisur hetimin për dy punonjëse të Postës Shqiptare në Bilisht, P. Sh. dhe E. Ç., të dyja nga ky qytet, për shpërdorim detyre dhe vjedhje fondesh. Dyshohet se gjatë periudhës së kaluar, nga shtatori 2025 deri në janar 2026, ato kanë vjedhur rreth 22 milion lekë të rinj nga fondet e postës si rezultat i manipulimeve të ndryshme.
Sipas hetimeve, P. Sh., e cila kishte rolin e përgjegjëses në zyrën postare Vishocicë, dyshohet se ka përvetësuar fonde pensionesh dhe ndihmash ekonomike, duke falsifikuar nënshkrimet e pensionistëve, shumica e të cilëve jetonin jashtë vendit. Ndërsa E. Ç., që shërbente si arkëtare, ka manipuluar dokumentet e arkës dhe mandatat e pagesave për të mbështetur vjedhjen e fondeve nga P. Sh.
Posta Shqiptare ka reaguar në lidhje me këtë incident, duke garantuar se shpërndarja e fondeve të pensioneve vazhdon pa ndërprerje dhe se nuk ka pasur mungesa në to. Institucioni deklaroi se, pas konstatimit të parregullsive, ka ndërmarrë veprime të menjëhershme për të raportuar rastin në organet e drejtësisë, dhe është angazhuar për të bashkëpunuar plotësisht me hetuesit.
Në reagimin e Postës Shqiptare theksohet se çdo formë abuzimi me detyrën do të trajtohet me seriozitet të lartë dhe se do të merren masa për të forcuar kontrollin e brendshëm me qëllim parandalimin e rasteve të ngjashme në të ardhmen. Sipas këtij njoftimi, për arsye të procesit hetimor dhe parimit të prezumimit të pafajësisë, nuk mund të jepen detaje të mëtjeshme.
Institucioni e cilëson këtë rast si të rëndësishëm dhe shpreh angazhimin për transparencë, ligjshmëri dhe mbrojtjen e interesit publik. Në fund, Posta Shqiptare siguron se duke vepruar kështu, po punon për të garantuar vazhdimësinë e shërbimeve ndaj qytetarëve.
