Një ngjarje tragjike ndodhi pasditen e djeshme në kantierin e Aeroportit të Vlorës, ku një punëtor humbi jetën pasi ra nga një lartësi.
Viktima ishte identifikuar si D. H., 38 vjeç, punonjës i një kompanie ndërtimi e angazhuar në projektin e aeroportit.
Nga hetimet e kryera nga specialistët për Hetimin e Krimeve në Komisariatin e Policisë Vlorë, është arrestuar në flagrancë D. N., 45 vjeç, banues në Tiranë, administrator i kompanisë ndërtuese. Po ashtu, ka nisur procedimi penal ndaj U. S., 41 vjeç, gjithashtu nga Tirana, i cili kishte funksionin e përgjegjësit të punimeve.
Sipas Policisë, të dy këta persona dyshohen për shkelje të detyrimeve ligjore mbi masat e sigurisë në punë, çka ka sjellë si pasojë vdekjen e punëtorit.
Fatkeqësisht duket se masat e sigurisë në Aeroportin e Vlorës nuk respekohen me rigorozitet, pasi rasti i djeshëm është i dyti në radhë, pasi në muajin janar një tjetër punëtor humbi jetën aksidentalisht.
Materialet hetimore për rastin e djeshëm i janë referuar Prokurorisë për veprime të mëtejshme ligjore.
