Kur Aston Villa të zbresë në “Parc des Princes” për t’u përballur me Paris Saint-Germain në çerekfinalen e Champions League, trajneri Unai Emery do të ndeshet për herë të parë me Luis Enrique pas asaj nate të paharrueshme në mars 2017, kur Barcelona përmbysi fitoren 4-0 të PSG-së dhe fitoi 6-1 në “Camp Nou”.
La Remontada – rikthimi më i famshëm në historinë e Ligës së Kampionëve – mbetet një plagë e hapur për Emery-n, një mbrëmje që kërcënoi të përcaktonte karrierën e tij. Ishte mbrëmja kur Neymar shkëlqeu, Sergi Roberto nuk mundi të flinte nga emocioni dhe Lionel Messi dominoi titujt kryesorë në mbarë botën.
Një plagë që s’shërohet lehtë
Emery kishte fituar tre Europa League me Sevillan dhe ishte i lavdëruar për punën e tij me Valenciën, por PSG ishte shansi për t’u afirmuar në elitën europiane – dhe ajo natë në Barcelonë u kthye në një traumë.
Megjithëse sezonin pasardhës fitoi katërshe të brendshme me PSG-në, humbja nga Barça ndikoi thellësisht në zgjedhjet e tij taktike, duke reflektuar edhe në eliminimin pasues nga Real Madridi në vitin 2018.
Një rikthim simbolik në Paris
Tani, 8 vite më vonë, Emery rikthehet në Paris, por në krye të një tjetër skuadre – Aston Villa. Dhe përballë ka pikërisht njeriun që i shkaktoi plagën më të thellë – Luis Enrique.
Luis Enrique, që atëherë deklaroi me guxim: “Nëse ata shënojnë katër, ne mund të shënojmë gjashtë.” Dhe e bëri realitet.
Por Emery nuk është më ai i dikurshmi. Ka fituar sërish Europën me Villarrealin, dhe ka kthyer Aston Villan në një nga skuadrat më kompetitive të Anglisë, pas më shumë se 40 vitesh mungesë në nivelet më të larta.
A është ky momenti i hakmarrjes?
Emery mund të ketë arritur sukseset e veta, por ajo humbje 6-1 është ende një hije që e ndjek. Tani, me një skuadër që ai e ka krijuar sipas filozofisë së tij, do të tentojë të tregojë se ka mësuar nga gabimet dhe është gati të sfidojë edhe një herë Luis Enrique – këtë herë në drejtimin e PSG-së.
Në fund të fundit, siç tha vetë Enrique atë natë:
“Ky sport është i mrekullueshëm. Gjithmonë të jep një shans tjetër për t’u hakmarrë.”
Ndoshta ky është shansi i Unai Emery-t.
