Pas fitimit të Topit të Artë, Ousmane Dembélé ka kërkuar një kontratë të re me kushte të përmirësuara te Paris Saint-Germain. Sipas “L’Équipe”, sulmuesi francez 28-vjeçar dhe drejtuesit e klubit kanë hapur bisedimet për rinovim, ndërsa kërkesa kryesore e lojtarit është një rritje e ndjeshme page.
Aktualisht, Dembélé përfiton rreth 18 milionë euro në sezon, por kërkon një marrëveshje të re që pasqyron statusin e tij si fitues i Topit të Artë dhe një nga lojtarët më vendimtarë të PSG-së. Kontrata aktuale skadon në vitin 2028, ndërsa klubi parisien nuk dëshiron ta humbasë lojtarin pa përfitime financiare.
Që prej transferimit nga Barcelona në vitin 2023 për 50 milionë euro, Dembélé ka zhvilluar 99 ndeshje, ka shënuar 43 gola dhe ka dhënë 32 asistime, duke qenë ndër protagonistët kryesorë në suksesin e PSG-së në Champions League sezonin e kaluar.
Vlera e tij në treg vlerësohet në 100 milionë euro, dhe pavarësisht negociatave të ndërlikuara, PSG e sheh francezin si një pjesë kyçe të projektit të ardhshëm të klubit.
