Mazhoranca ka rrëzuar kërkesën e opozitës për qeveri teknike. Ishte Sekretari i Përgjithshëm i PS-së, Blendi Klosi ai i cili tha se në zgjedhje do të shkohet me këtë qeveri dhe me kryeministër Edi Ramën. Deklaratat Klosi i bëri nga Shkodra.
“Ajo që ne e thamë dhe në takim me partinë është që mesazhi i vetëm që vjen nga PD është kërkesa për një qeveri teknike, të ikë Edi Rama se me Edi Ramën ata nuk fitojnë dot. Në fakt kjo nuk është më problem i PS, duhet të jetë problem i tyre që nuk arrijnë të gjejnë dot asnjë mundësi për t’u përballur me Edi Ramën dhe Partinë Socialiste. Në këto kushte ne kemi vetëm një përgjigje: forcimin e PS, organizimin e saj në të gjithë territorin dhe kërkesën që jo vetëm të fitojmë 2025-ën, port a fitojmë atë bindhsëm dhe natyrisht të tregojmë forcën që ne kemi dhe përgjigjën që na japin qytetarët. Nuk ka asnjë shans që të hapet ky diskutim”, tha Klosi.
Ai u ndal edhe te tensionet që u shkaktuan nga opozita në Parlament pasditen e 30 shtatorit. Klosi tha se akte të tilla vandale do të marrin përgjigje si duhet.
“Ajo që ndodhi në Parlament nuk është politikë, është një vepër penale. Është dëmtim i pronës shtetërore me vetëdije dhe rrezikim i jetës, jo vetëm të kryetares së Parlamentit që u godit në mënyrë të papërgjegjshme me mjete të rënda, por edhe rrezikimi i djegies së të gjithë Parlamentit shqiptar. Veprimi hyn në vandalizëm dhe përgjigja do të jetë si për vandalët”, tha Klosi.
Opozita hodhi sende të forta në drejtim të kryeparlamentares Elisa Spiropali dhe dogji karriget jashtë Kuvendit gjatë seancsë plenare. Flamur Noka paralajmëroi se nuk do të ketë më seanca të qetë. Opozita iu rikthye sërish skenarëve të kaosit pas dënimit të Ervin Salianit më 26 shtator me një vit burg për kallëzim të rremë./ilirianews
