Deputeti i Partisë Socialiste, Ulsi Manja, ka deklaruar në Kuvend se shumica parlamentare i ka propozuar Kuvendit rrëzimin e kërkesës së SPAK për dhënien e autorizimit për arrestimin e deputetes Belinda Balluku. Ai tha se raporti i shumicës është bërë publik dhe se gjatë seancës do të paraqiten arsyet që çuan në këtë qëndrim.
Gjatë fjalës së tij në Kuvend, Manja u shpreh se kjo është hera e shtatë që në Parlament paraqitet një kërkesë për dhënie autorizimi për arrestimin e një deputeti. Sipas tij, raporti i paraqitur këtë herë përmban një analizë shumë të detajuar të fakteve.
“Raportin tonë e kemi bërë publik. Sot do të jap arsyet pse ne, si anëtarë të shumicës, i kemi propozuar Kuvendit rrëzimin e kërkesës së SPAK për arrestimin e deputetes Belinda Balluku. Në këtë sallë kjo është kërkesa e shtatë për dhënie autorizimi për arrestimin e një deputeti, por nuk kam dëgjuar më parë një raport kaq të detajuar në analizën e fakteve,” u shpreh Manja.
Ai shtoi se, sipas tij, kjo situatë bie ndesh me nenin 288 të Kodit të Procedurës Penale. Manja solli në vëmendje edhe një rast të mëparshëm në dhjetor të vitit 2023, kur Kuvendi shqyrtoi kërkesën për arrestimin e një tjetër deputeti.
“Një raport kaq të detajuar nuk e kam dëgjuar as në dhjetor 2023, kur u kërkua arrestimi i një tjetër deputeti. Në atë kohë opozita kërkonte rrëzimin e kërkesës së SPAK,” tha ai.
Sipas Manjës, shumica do t’i qëndrojë besnike nenit 70 të Kushtetutës në raportin e saj. Ai theksoi se, në momentin kur u paraqit raporti për dhënien e autorizimit për arrestimin e Ballukut, ka ndodhur një realitet i ri faktik dhe institucional që, sipas tij, ndryshon natyrën e vlerësimit të çështjes.
