Prokurori i shtetit në Maqedoninë e Veriut, Ljupço Kocevski, theksoi se prokurorët publikë kanë realizuar sot një inspektim në diskotekën “Puls” në Koçan dhe kanë zbuluar disa parregullsi të rënda.
Kocevski njoftoi se është vërtetuar se objekti nuk disponon një rrjet hidranti, ka një numër të pamjaftueshëm të aparateve për fikjen e zjarrit, dyer të pamjaftueshme dhe çati jorezistente ndaj zjarrit. Po ashtu, objekti është ndërtuar për industrinë e lehtë dhe jo për qëllime hotelerie.
Ai shtoi se ka formuar një grup prokurorial, ku ndërmarrë disa veprime, përfshirë urdhrin për autopsinë e viktimës, si dhe urdhër arresti për çdo individ që mund të ketë kontribuar në këtë ngjarje. Prokurori ka kërkuar edhe sekuestrimin e filmimeve të kamerave të sigurisë nga Gjykata Themelore e Koçanit dhe dokumentacionin e diskotekës. Po ashtu, është lëshuar urdhër bastisje për një shtëpi dhe disa objekte të tjera në Koçan.
Inspektimi në vend ka vazhduar, dhe Kocevski deklaroi se do të angazhojë më shumë prokurorë, duke theksuar se rasti është kompleks dhe kërkon një hetim të thelluar. Nga inspektimi i sotëm, janë konstatuar kushtet e mëposhtme:
- Objekti nuk kishte rrjet hidranti.
- Numri i aparateve për fikjen e zjarrit ishte tepër i ulët, vetëm dy.
- Dyer të mjaftueshme nuk kishte; përveç hyrjes, kishte vetëm një derë të improvizuar nga mbrapa, e cila ishte e mbyllur me dry dhe pa dorezë, duke përdorur karton gipsi.
- Nuk kishte mundësi aksesi për automjetet e pajisjeve për fikjen e zjarrit.
- Pjesa e brendshme e objektit ishte ndërtuar me karton gipsi pa karakteristika rezistente ndaj zjarrit.
- Çatia nuk kishte rezistencë ndaj zjarrit për të paktën 30 minuta.
- Nuk kishte sistem alarmi për zjarri, as një sistem frenimi për dyer.
- Objekti ishte i veshur me materiale izoluese që ishin të lehta për t’u ndezur.
- Përdorimi i materialeve piroteknike ka qenë i paligjshëm dhe pa leje.
- Inspektorati Shtetëror i Ndërtimtarisë dhe Urbanistikës gjithashtu ka marrë pjesë në inspektim. Objekti është regjistruar si një hapësirë për industri të lehta, me një sipërfaqe prej 419 metra katrorë, dhe nuk ka kaluar në përdorim hotelerie. Megjithatë, objekti ka një leje operimi si objekt katering të lëshuar nga Ministria e Ekonomisë para 15 vitesh, ndonëse nuk është bërë ndonjë shndërrim i tillë në objekt.
