Protesta masive kanë shpërthyer ditën e sotme në Turqi, pasi autoritetet arrestuan kryebashkiakun e Stambollit, Ekrem Imamoglu, vetëm pak ditë para se ai të shpallej kandidati zyrtar për president nga opozita.
Imamoglu, një nga figurat e Partisë Laike Republikane Popullore (CHP), shihet gjerësisht si rivali më i fortë politik i presidentit aktual, Recep Tayyip Erdogan.
Prokuroria e akuzoi Imamoglun për korrupsion dhe bashkëpunim me një organizatë terroriste, duke e cilësuar atë si “të dyshuar për drejtimin e një grupi kriminal”. Përveç tij, u arrestuan edhe 100 persona të tjerë, në një lëvizje që opozita e ka denoncuar si një “grusht shteti” nga Presidenti Erdogan.
Pas arrestimit të tij, mijëra qytetarë mbushën rrugët e Stambollit për të protestuar. Shumë prej tyre u mblodhën jashtë selisë së policisë, Bashkisë së Stambollit dhe selisë së CHP-së të Imamoglu.
Një prej protestuesve e cilësoi arrestimin “të paligjshëm dhe të pabazë’’. ‘‘Kjo nuk është demokraci. Është një mashtrim i demokracisë. Populli nuk e meriton këtë. Natyrisht, ne jemi të mërzitur. Si njerëz, ne jemi të mërzitur,” u shpreh ai.
Në përpjekje për të ndaluar protestat, guvernatori i Stambollit urdhëroi mbylljen e rrugëve kryesore, stacioneve të metrosë dhe qendrave të transportit publik. Për më tepër, qeveria ndërmori masa të ashpra të censurës, duke bllokuar aksesin në rrjetet sociale si X (Tëitter), Instagram, YouTube dhe TikTok. Aktivistët e e shohin këtë hap si një përpjekje për të heshtur zërin e qytetarëve dhe për të penguar organizimin e protestave.
