Qytetarët gjeorgjianë po vazhdojnë të protestojnë kundër një vendimi të qeverisë së vendit për të ndërprerë negociatat e anëtarësimit me Bashkimin Evropian. Këto protesta kanë filluar prej afro një jave dhe janë përhapur në të gjithë sheshet e kryeqytetit Tbilisi. Protestuesit e konsiderojnë këtë vendim si të padrejtë dhe kërkojnë që Gjeorgjia të vazhdojë procesin e integrimit në BE.
Protestat nisën fillimisht brenda parlamentit pas përfundimit të zgjedhjeve të 26 tetorit, ku fitoi partia pro-ruse “Ëndrra Gjeorgjiane”. Opozita e akuzoi qeverinë për manipulim të rezultateve dhe vjedhje të zgjedhjeve. Pas këtyre zhvillimeve, një valë protestash shpërtheu në të gjithë vendin, me qytetarët që mbështetën opozitën dhe mbushën rrugët e Gjeorgjisë.
Përplasjet me policinë janë intensifikuar, ku qytetarët kanë përdorur fishekzjarrë ndaj forcave të rendit, ndërkohë që policia ka përdorur gaz lotsjellës dhe ujë për të shpërndarë turmat. Kryeministri i ri i Gjeorgjisë, Irakli Kobakhidze, ka deklaruar se këto protesta janë të ndikuara nga faktorë të jashtëm dhe ka theksuar se janë një pasojë e përpjekjeve për të destabilizuar vendin.
Ndërkohë, këto protesta kanë shkaktuar lëndime tek disa persona dhe tensionet vazhdojnë të rriten, duke kërcënuar paqen dhe stabilitetin politik të Gjeorgjisë. Protestuesit janë të vendosur të vazhdojnë luftën e tyre për të siguruar një të ardhme të lidhur më ngushtë me Evropën.
