Shembja e një muri pritës në segmentin rrugor Maliq–Lozhan, në afërsi të urës së Qenckës, ka vënë në lëvizje institucionet përgjegjëse, ndërsa raportohet se Prokuroria pritet të nisë hetimet për të verifikuar rrethanat e ngjarjes dhe përgjegjësitë përkatëse.
Ngjarja u regjistrua në kilometrin e 13-të të këtij aksi, ku sipas informacioneve paraprake, një masiv dheu ka rrëshqitur duke dëmtuar murin pritës dhe duke krijuar vështirësi në qarkullimin e automjeteve. Aktualisht, lëvizja kryhet vetëm në një korsi dhe drejtuesit e mjeteve duhet të tregojnë kujdes të shtuar.
Ky segment rrugor është ndërtuar nga kompania Gjikuria SHPK, në pronësi të Florenc Gjikurisë. Burime bëjnë me dije se organi i akuzës pritet të verifikojë dokumentacionin teknik, zbatimin e projektit dhe cilësinë e punimeve, për të përcaktuar nëse ka shkelje apo përgjegjësi ligjore në lidhje me dëmtimin e murit.
Ndërkohë, përfaqësues të kompanisë janë shprehur jozyrtarisht se nuk shohin arsye për shqetësim lidhur me situatën e krijuar.
Prokuroria pritet të dalë me një reagim zyrtar pasi të nisë procedurat dhe të kryejë verifikimet përkatëse.
Në murin e betonit që u shemb ditën e shjeshme mund të shihet se mungojnë thuajse plotësisht shufrat e hekurit, duke ngritur dyshime më serioze lidhur me cilësinë e punimeve.
