Ndërsa vetëm disa orë na ndajnë nga fillimi i procesit të votimit në mbarë vendin për zgjedhjet e reja parlamentare, përfaqësuesit e SPAK-ut dhe agjentët e Byrosë Kombëtare të Hetimit kanë mbërritur në qytetin e Vlorës.
Sipas raportimeve, në këtë qark ndodhet tashmë Prokurori i Posaçëm Bledar Maksuti, ndërsa nesër pritet të mbërrijë edhe Prokurorja Elida Kaçkini. Së bashku me agjentët e BKH-së, ata do të ndjekin nga afër ecurinë e votimit dhe procesin e numërimit të votave.
Deri tani nuk janë evidentuar parregullsi nga prokurorët e Strukturës së Posaçme Kundër Korrupsionit dhe Krimit të Organizuar. Megjithatë, Prokuroria e Sarandës ka hapur dy procedime penale, ndërsa ajo e Vlorës ka regjistruar një rast.
Ndërkohë, agjentët e BKH-së janë shpërndarë në të gjitha bashkitë e qarkut të Vlorës për të monitoruar nga afër situatën.
Vlen të përmendet se SPAK dhe Komisioni Qendror i Zgjedhjeve po bashkëpunojnë ngushtësisht për të parandaluar dhe hetuar krimet zgjedhore. Për këtë qëllim, janë ngritur 16 zyra në të gjitha qarqet e vendit, të cilat janë në dispozicion të qytetarëve për të denoncuar çdo parregullsi.
Në terren janë angazhuar 16 prokurorë, nga të cilët 3 në Tiranë, 3 në Vlorë, 2 në Fier dhe nga 1 në çdo qark tjetër.
