Telashe të tjera për Real Madridin. Sipas raportimeve pas stërvitjes së mëngjesit të së premtes, Rodrygo nuk u stërvit me grupin dhe punoi vetëm në palestër, për shkak të një mbingarkese muskulore dhe shqetësimi në këmbën e majtë.
Braziliani pritej të ishte titullar kundër Valencias në Mestalla (të dielën, ora 21:00), duke marrë rolin e Viniciusit, i cili mungon për shkak të pezullimit nga kartonët e verdhë. Në listën e mungesave është edhe Bellingham, që ka përpara rreth një muaj rikuperim, ndërsa Militao vazhdon të jetë jashtë për një dëmtim afatgjatë.
Stërvitja ka lënë gjithashtu pikëpyetje për gjendjen e Rüdiger dhe Carvajal, me vendimin përfundimtar që pritet pas seancës së së shtunës, e fundit para udhëtimit drejt Mestallas. Po atëherë pritet të vendoset edhe nëse Rodrygo do të udhëtojë me skuadrën, por fakti që nuk u stërvit me ekipin e bën të vështirë që ai të nisë nga minuta e parë ndaj Valencias.
Këto probleme i shtohen edhe situatës së fundit disiplinore të Rodrygos, i cili po vuan pezullimin me dy ndeshje pas kartonit të kuq direkt në Lisbonë. Ndërkohë, me ndryshimet e fundit te Reali, ai kishte humbur hapësira në formacion, por pezullimi i Viniciusit i hapte mundësinë të rikthehej në krahun e majtë — plan që tani rrezikon të prishet nga ky shqetësim fizik.
