Në një intervistë për “Top Channel”, prindërit e Irsa Muçollarit, 16-vjeçares që i dha fund jetës, kanë thyer heshtjen në lidhje me ngjarjen që u hapi një plagë mu në zemër.
Pikëpyetjet e shumta në lidhje me arsyet se çfarë e çoi 16-vjeçaren në vetëvrasje të hënën e shkuar kërkojnë përgjigje që nuk i di askush deri më tani.
Mamaja e Irsës mes lotësh Mirela Muçollari rrëfen se do i mbetet peng që nuk kuptoi dot gjendjen e vajzës së saj.
“Do më mbetet peng tërë jetën dhe në kokën time kam vetëm ‘PSE? PSE?’. Kush ma mërziti kaq shumë dhe nuk e kuptoi asnjë njeri? Ne e donim aq shumë. Unë për atë jetoja për atë punoja! Të gjesh fëmijën kur vjen nga puna në atë gjendje. I dhashë frymë, nuk e shpëtova!”.
Nga ana tjetër Ilir Muçollari, babai i Irsës dëhsmon se kohët e fundit vajza e tyre sikur kishte ndryshuar pak sjelljen por kjo gjë nuk I majftoi atij dhe gruas që të kuptonin se e vogla e tyre kishte nevojë për ndihmë.
“Kohët e fundit e shikoja që kishte ndryshuar sjellje, ishte pak me e mërzitur, por nuk na shkonte mendja për vajzën që të shkonte deri në këtë pikë. Se ka qenë shume e sjellshme, shumë e mirë, shumë e urta, e pyesja sa vinte nga shkolla: ‘Si kalove të keqen babi?. Mirë, babi mirë’. Edhe kjo na ka çuditur”.
Prindërit e viktimës mes një dhimbje të madhe e cila duket se nuk do të ketë shërim, përpiqen të kujtojnë bisedat e fundit me vajzën, para aktit të vetëflijimit.
“Ditën e fundit më ka ardhur 20 minuta para se të mbaronte shkolla, më tha mbaruam shpejt. Para një jave i tha duke qarë mamasë ma ndërro klasën se ata nuk mësojnë. Janë 6 orë si do duroj çdo ditë kështu”.
“Bëjnë si të çmendur më tha mua. Qeshin kot, flasin kot dhe nuk më pëlqen. Donte të shkonte te klasa që kishte shoqet e 9-vjeçares. I thashë merru me veten, injoroji ata. Ashtu bëj më tha, por janë 6 orë o mami më tha. Të marr mësuesen, të ndërrojmë bankën. Jo, jo tha se është më keq ashtu. Si duket i vinte turp se do ta bullizonin shokët përsëri. Jo, jo, bëra gabim që të thashë…”.
