Presidentja e Kosovës, Vjosa Osmani, ka shprehur urimet e saj për Donald Trumpin pas betimit të tij si President i 47-të i Shteteve të Bashkuara të Amerikës.
Në mesazhin e saj drejtuar Presidentit Trump, Osmani ka theksuar se fitorja e tij përfaqëson besimin e thellë të popullit amerikan në udhëheqësinë dhe vizionin e tij për mbrojtjen e vlerave të lirisë dhe demokracisë, vlera që janë gjithashtu themelore për marrëdhëniet mes Kosovës dhe SHBA-ve.
Ajo ka falënderuar SHBA-të për mbështetjen historike ndaj Kosovës gjatë periudhave më të vështira të saj dhe ka theksuar se angazhimi amerikan ka shpëtuar popullin kosovar nga një regjim gjenocidal, duke kontribuar në krijimin e një shteti të pavarur dhe të qëndrueshëm.
Kosova, si një aleat dhe partner i çmuar i SHBA-ve, është e përkushtuar për të forcuar më tej marrëdhëniet dhe për të kontribuar në një të ardhme të sigurt dhe paqësore, ka theksuar Osmani. Ajo gjithashtu ka shprehur mbështetje për angazhimin e Presidentit Trump në promovimin e njohjes reciproke mes Kosovës dhe Serbisë, duke besuar se kjo do të çojë në një paqe të qëndrueshme në Ballkan dhe më gjerë.
Presidentja Osmani ka nënvizuar se Kosova mbetet kombi më pro-amerikan në botë dhe është e gatshme të vazhdojë të forcojë partneritetin me SHBA-në për të mirën e popullit dhe brezave të ardhshëm.
