Presidentja e Kosovës, Vjosa Osmani, është kërcënuar ditën e sotme përmes një e-maili. Në e-mailin e dërguar nga Betim Ibrahimi, gjuha e përdorur është përçmuese, ofenduese ndërsa flitet për një hakmarrje ndaj familjes së Presidentes së Kosovës, Vjosa Osmani për “tradhti” dhe vendime të pretenduara politike si ndërrimi i flamurit apo zbatimi i gjuhësisë në komunikimin zyrtar.
“Edhe familja jote. Për tradhti. Për ndërrimin e flamurit tonë. Për ndjekjen e njerëzve dhe marrjen e vendimeve bazuar në mendimet e tyre… A janë shenjat në Serbi në të dyja gjuhët, shqip dhe serbisht?”-shkruhet ndër të tjera në emailin e dërguar më 16 korrik në ora 00:15.
Mesazhi është shoqëruar edhe me një paralajmërim automatik të sistemit informativ të presidencës që e cilëson emailin si të ardhur nga jashtë organizatës.
Ende nuk ka ndonjë reagim zyrtar nga Presidenca apo Policia e Kosovës ndërsa hetimet nga autoritetet e Kosovës vijojnë. Presidentja e Kosovës, Vjosa Osmani, prej kohësh ka qenë në qendër të “sulmeve” dhe kërcënimeve nga persona të paidentifikuar.
