Kryetari i Bashkisë së Tiranës, Erion Veliaj, do të dalë sot, 8 korrik, para Gjykatës së Lartë ku do të shqyrtohet kërkesa e tij për ndryshim të masës së sigurisë.
Në këtë seancë do të vendoset nëse ai do të vazhdojë të qëndrojë në paraburgim apo do të ketë një masë më të lehtë sigurie.
Trupa gjykuese përbëhet nga gjyqtarët Medi Bici dhe Sokol Binaj, ndërsa relatore e çështjes është Albana Boksi. Ata do të shqyrtojnë argumentet e mbrojtjes përballë qëndrimit të SPAK, që kërkon vazhdimin e paraburgimit deri në përfundim të hetimeve.
Veliaj u arrestua më 10 shkurt dhe prej atëherë ndodhet në ambientet e paraburgimit në Durrës, me afro pesë muaj në qeli.
Vendimi i sotëm pritet të ketë ndikim të rëndësishëm edhe për bashkinë më të madhe në vend, teksa ekziston mundësia për zgjedhje të parakohshme.
Veliaj depozitoi rekursin më 19 maj 2025, duke kundërshtuar vendimin e Apelit të GJKKO-së, për masën e “arrestit me burg”. Rekurs në GJL kanë bërë edhe disa prej biznesmenëve të përfshirë në çështje, ndërsa bie në sy mungesa e emrit të bashkëshortes së kryebashkiakut, Ajola Xoxa.
Veliaj po hetohet për dyshime mbi konsumimin e veprës penale të “korrupsionit pasiv” në të paktën nëntë raste, ndërsa së fundmi atij iu shtua edhe akuza për fshehje pasurie.
