Elon Musk i telefonoi Presidentit Donald Trump të hënën në mbrëmje, thanë për CNN dy burime të afërta me situatën, në një përpjekje për të qetësuar tensionet pas përplasjes së fortë dhe publike mes tyre javën e kaluar.
Miliarderi i teknologjisë më pas u tërhoq publikisht nga komentet e tij kritike, duke kërkuar ndjesë dhe duke pranuar se kishte “shkuar shumë larg”.
Telefonata e shkurtër mes Musk dhe presidentit ndodhi pas ndërhyrjes së zëvendëspresidentit JD Vance dhe shefes së stafit të Shtëpisë së Bardhë, Susie Wiles, të cilët folën me Musk të premten për të diskutuar për përplasjen e tij me Trump. Sipas burimeve, qëndrimi i Musk filloi të zbutet menjëherë pas këtyre bisedave.
Musk më pas fshiu disa nga postimet më të ashpra në rrjetet sociale, përfshirë një që lidhej me Jeffrey Epstein dhe një tjetër ku pajtohej me idenë se Trump duhej të shkarkohej. Të mërkurën, ai shkroi në platformën X:
“Më vjen keq për disa nga postimet e mia rreth Presidentit @realDonaldTrump javën e kaluar. Shkuan shumë larg.”
Sipas CNN, Trump kishte këshilluar JD Vance që të ishte diplomatik në deklaratat e tij publike për këtë çështje. Në një intervistë gjatë një podkasti me Theo Von, të regjistruar të enjten dhe publikuar të shtunën, Vance tha se sulmet e Musk ndaj presidentit ishin një “gabim i madh”, por shtoi se besonte se marrëdhënia mes tyre mund të riparohej.
Tensionet nisën nga një përplasje mbi projektligjin për politikën e brendshme dhe u përshkallëzuan në akuza të ndërsjella, por fundjava solli një qasje më të butë nga Musk. Ai shfaqi mbështetje për qasjen e administratës Trump ndaj trazirave në Los Angeles dhe postoi flamuj amerikanë në një deklaratë të Vance, ku thuhej se “presidenti nuk do të tolerojë dhunën dhe trazirat”.
Musk gjithashtu ndau një postim nga rrjeti social Truth i Trump, ku ai kërkonte falje publike nga Guvernatori i Kalifornisë Gavin Newsom dhe Kryetarja e Bashkisë së Los Angeles, Karen Bass. Ai gjithashtu riktheu ndjekjen e disa aleatëve të Trump, përfshirë Stephen Miller dhe Charlie Kirk, të cilët ai i kishte hequr nga lista gjatë përplasjes.
Charlie Kirk, një mbështetës i zëshëm i Trump, u shpreh se ishte i bindur se marrëdhënia mund të normalizohej.
“I njoh të dy këta djem… Do të bëj gjithçka që mundem për t’i sjellë sërish në një mendje,” tha ai për Megyn Kelly.
Ndërkohë, vetë Presidenti Trump e përshëndeti gjestin e Musk, duke i thënë The New York Post në një intervistë të shkurtër:
“Mendova se ishte shumë mirë që ai e bëri këtë.”
Të gjitha shenjat tregojnë se përplasja e javës së kaluar mund të jetë drejt zgjidhjes, me mundësinë e riparimit të një aleance që dikur konsiderohej strategjike për të dy.
