Një sasi armësh dhe municionesh është zbuluar e fshehur në një automjet të ndodhur në një kontenier në Portin e Durrësit, gjatë një kontrolli të ushtruar nga Policia Kufitare në bashkëpunim me autoritetet doganore dhe Drejtorinë Vendore të Policisë Durrës.
Sipas njoftimit zyrtar, brenda automjetit tip Land Rover, që ishte në tranzit doganor nga Kosova drejt Republikës Demokratike të Kongos, u gjetën të fshehura dy armë zjarri automatike, një armë pistoletë, 1580 fishekë luftarakë të kalibrave të ndryshëm, si dhe 12 krehra fishekësh.
Automjeti kishte hyrë në territorin shqiptar përmes Pikës së Kalimit Kufitar në Morinë më 20 dhjetor 2022. Prej asaj kohe, kontenieri ku ndodhej mjeti ishte i mbyllur në sheshin e kontenierëve të portit, pasi dërguesi nuk ishte paraqitur për të kryer procedurat doganore. Autoritetet vendosën hapjen dhe kontrollin e kontenierit më 4 qershor 2025.
Pas zbulimit të arsenalit të armëve, hetimet e Policisë kanë çuar në identifikimin dhe shpalljen në kërkim të një shtetasi kosovar, Y. I., 24 vjeç, si posedues i dyshuar i armëve dhe i përfshirë në tentativën për trafikim të tyre drejt Kongos. Bashkëpunimi me Policinë e Kosovës është intensifikuar për lokalizimin dhe kapjen e tij.
Armët e sekuestruara do t’i nënshtrohen ekzaminimeve të detajuara teknike, balistike dhe daktiloskopike në Institutin e Policisë Shkencore për të verifikuar nëse janë përdorur në ndonjë ngjarje kriminale të mëparshme.
Hetimet vijojnë nën drejtimin e Prokurorisë së Rrethit Gjyqësor Durrës, me qëllim dokumentimin e plotë ligjor të ngjarjes dhe identifikimin e të gjithë personave të përfshirë në këtë veprimtari kriminale.
